Ґойдич Павло Петро уродився 17 юлія 1888 года у Руськых Пеклянах, Австро-Мадярська імперія, умер 17 юлія 1960 года, Леопольдов Чехословацька Республіка — греко-католицькый єпископ Пряшовської єпархії (1940-1960гг.), василіян, блаженный сященномученик Католицької Церкви, Праведник світа.
Уродився Петро Ґойдич (мирське імня Павло) у 1888 годі у русинськуй сімні у селови Руські Пекляны, що не далеко вд Пряшова.
Бизувно двісто году из роду Ґойдичув виходили греко-католицькі сященикы. Отиць будущого єпископа Щефан Ґойдич быв сященником. Мати Аанна Гербері тоже походила из сященицької сімні. Двоє старшых братю Петра — Корнелій і Щефан — тоже стали сящениками. У 1907 годі Петро вступає до єпархіальної семінарії у Пряшові. Выдты пак до Будапешта, де єпископ Щефан Новак призначає його протоколістом і архіваріусом єпископської курії. Пак май погодя ґенеральный вікарій Никола Руснак доручає му ище май велику посаду — директора єпископської канцелярії.
Айбо Ґойдич убирає путь манаха. Ієромонах-василіянин, 22 юлія 1922 года Ґойдич уступає до василіянського манастыря що на Чорнечій горі у Мукачові. 10 марта 1924 года Павло быв пострыженый у манахы. Вун став першым реформованым василіянськым сящеником, якый выйшов из убновленого новіціату у Мукачові. Його назначают заступником ієгумена Ужгородського манастыря.
У 1918 годі Пряшовська єпархія не мала єпископа і Апостольський Престол рішив призначити молодого і побожного манаха Павла Ґойдича апостольськым адміністратором Пряшовської єпархії.
25 марта 1927 года у Базиліці сятого Климента у Римі, де похороненый апостол словян сятый Кирил, Павла Ґойдича было висячено на єпископа. Уже у свойому першому пастырському письмови до сященикув вун писав: «Удкрыйте свої сященицькі серця і прийміт у своюй любови наш изтерзаный русинськый народ. Русины заслуговуют на ліпшу долю. Сокотім не ганьбімся свойим словом, і за свою русинську ідентичность, за свою материнську бисіду, и быти гордим за свуй русинськый род».
17 юліяя 1960 года у динь свого нароженя Павло Ґойдич умер, послє 10 году у комуністичных лаґерях.
4 новембра 2001 года на площади перед собором сятого Петра у Римі, Папа Іван-Павло II перед тисячами паломнику из разных держав проголосив імена восьми новых блаженных. Серед них быв сященномученик Павло Ґойдич. Динь честованя його памняти у церковному календарьови удмічаєся 17 юлія — динь його смерти.